Skaak by Hoërskool Randburg is opwindend en uitdagend. Alhoewel die skaakklub klein is, neem ons spanne in beide die Junior en Senior ligas deel. Ons besoek ook gereeld ander skole om kragte teen hulle te meet. Ons word elke jaar uitgenooi om in Februarie aan die skaaktoernooi deel te neem wat by Grey College in Bloemfontein gehou word.
Van ons spelers is uitstekend en sommige van hulle speel selfs skaak op provinsiale vlak. Hulle speel weekliks teen mekaar in 'n atmosfeer van aanmoediging en vriendelike kompetisie. Om seker te maak dat hulle die nodige onderrig en stimulasie ontvang, word hulle weekliks afgerig deur die Springbok skaakspeler, Nic van der Natt, onder wie se deskundige leiding hulle voortdurend verbeter.
Die lede van die skaakklub by die Hoërskool Randburg weet dat die speel van skaak nie alleen opsigself die moeite werd is nie, maar dat dit ook hulle volle akademiese prestasie bevoordeel. 'n Verdere voordeel is dat skaak spelers leer om strategies te dink, en dit leer elkeen van hulle 'n waardevolle vaardigheid wat hulle vir die res van hulle lewens kan benut.
