Die Voortrekkers is 'n plek waar jeuglede kultuur, in die natuur, deur avontuur geniet.

Waar anders sal jeug, (jong volwassenes eintlik) vandag die kans kry om kranse uit te klim, staproetes te verken, in branders te roei, deur riviere te swem, in skuilings wat hulle self gebou het te slaap, rigting met sterre te vind of sommer net laataand om 'n kampvuur te kuier?  Intussen word leierskapsvaardighede ontwikkel, 'n liefde vir ons taal, kultuur en land gekweek en Christelike geloof prakties uitgeleef.

Die Voortrekkers skroom ook nie om netelige kwessies soos sosiale druk en geestesgesondheid met sensitiwiteit en groot verantwoordelikheid te bespreek nie.  Kritiese denke, nie slaafse navolging nie, word aangewakker deur groepsgesprekke en individuele opdragte.

Die Voortrekkers is 'n kultuurbeweging wat die moderne Afrikaner, in besonder sy jeug, bemagtig om as positiewe Burgers en konsekwente Christene suksesvol te wees in hulle roeping tot diens.  Die Verkenner spesifiek word toegerus vir volwasse wees, sonder om kindwees te verloor.

Randjies kan aalsluit by Unika, Weltevrede of Klipfontein Voortrekkers of besoek ons webtuiste by wwww.voortrekkers.co.za vir meer inligting.

Komaan, kom sluit aan by Die Voortrekkers- jou verkennerlewe wag!